DESPRENDEMENTOS DA CORNIXA DO INSTITUTO

A finais de xuño desprendéronse cascotes da cornixa do IES en dous lugares diferentes: na fachada principal a poucos metros da porta de entrada e na parte posterior. Por sorte non houbo que lamentar desgrazas persoais.

A dirección do centro enviou un informe á Consellería e enviaron unha persoa da Unidade Técnica para inspeccionar os desperfectos. Segundo nos informaron hai regañas por varios sitios na cornixa polo que habería que avaliar o seu estado en todo o contorno do edificio.

A mediados de xullo os representantes dos pais puxémonos en contacto coa Consellería para concertar unha entrevista co Delegado Territorial, Sr. Ramos Ledo. Por medio da súa secretaria contestáronnos que non facía falta tal entrevista, que xa estaba o problema nas mans dunha empresa para solucionalo.

Como o tempo ía pasando e non viamos ningún movemento, o 21 de agosto personámonos na Consellería para volver a entrevistarnos co Delegado Territorial. Citounos para o día 23. O día seguinte, o 22, persoal da Consellería visitou o centro (¿casualidade ou causalidade?).

Na entrevista do día 23 de agosto tamén asistiu a técnica da Consellería. Cando nós pensabamos que nos ían informar da xestións realizadas, a reunión adicouse a pensar e buscar solucións a como se ía afrontar o problema (¿non estaba xa desde o mes de xullo en mans dunha empresa?).

A día de hoxe, unha semana antes de que comecen as clases, segue o problema sen solucionarse.

Para buscar unha postura conxunta convócanse ós pais/nais a unha reunión, o xoves 13 de setembro, ás 20:30.